2010, സെപ്റ്റംബർ 17, വെള്ളിയാഴ്‌ച

എന്റെ ആത്മാവുറങ്ങുന്ന വഴികള്‍ (ജന്യ)


എന്റെ ആത്മാവുറങ്ങുന്ന വഴികള്‍  നിങ്ങള്‍,
എന്റെ ചേതന പോല്‍ ഹൃദ്യമാം
പകല്‍ ചിത്രം നിങ്ങള്‍,
പാതിരാവില്‍ വിരിയുന്ന പ്രതീക്ഷയുടെ
പകല്‍ ചിത്രം,
ഞാനറിയാതെ എന്നെ വരിയുന്ന,
എന്റെ പാതയില്‍ വെളിച്ചം വിതറുന്ന
തെരുവുവിളക്കുകള്‍ നിങ്ങള്‍.
എന്റെ നിദ്രയിലെ സഹപാഠികള്‍ നിങ്ങള്‍,
ആരുടെയോ കരം കവര്‍ന്ന മൃദുല മോഹങ്ങള്‍ നിങ്ങള്‍.
എന്റെ വഴിയിലെ ആത്മാവു നിങ്ങള്‍,
എന്റെ ആത്മാവു നീങ്ങുന്ന വഴിയും നിങ്ങള്‍.
എന്നെ ഞാനാക്കിയ,
എന്റെ മോഹങ്ങള്‍ പുഷ്പിതമാക്കിയ,
എന്റെ പ്രിയ സഹചാരികള്‍ നിങ്ങള്‍.
ശൂന്യമാം ഇടനാഴികളില്‍ പോലും എന്നെ നയിക്കുന്നു നിങ്ങള്‍,
ഞാനെന്ന ചിത്രത്തെ ജീവിതത്തിന്റെ ക്യാന്‍വാസി-
ലടയാളപ്പെടുത്തിയ പ്രിയ കൂട്ടുകാരെ,
എന്റെ പ്രിയ സ്വപ്നങ്ങളെ...... നിങ്ങളാണേ-
ന്നിലെ ഇരുളും വെളിച്ചവും, നിങ്ങളാണെന്നിലെ 
ചേതന പോലും.
നിങ്ങളില്ലാതെ ഇല്ലിനി ജന്മം
ഞാനെന്ന സത്യംപോലും ഇല്ലാതെയാകുന്നു.
എന്നിലെ ആത്മാവുപോലും നിശ്ചലമാകുന്നു!
                                    ജന്യ പി വി (12 ബി)   

2010, സെപ്റ്റംബർ 16, വ്യാഴാഴ്‌ച

ദൈവത്തിന്റെ വിലാസം (ഇന്ദുജ)



സഹ്യപര്‍വ്വതത്തില്‍ തല -
ചായിച്ചുറങ്ങുന്ന ശംഖേ
ഞാന്‍ നിന്നെ കേരളം 
എന്നു വിളിച്ചോട്ടേ.
എന്റെ നാടേ, എന്റെ വീടേ
മമ സോദരങ്ങള്‍ വസിക്കുന്ന നാടേ. 
ഗോകര്‍ണ്ണേശപ്പനും കന്യാകുമാരിയും 
കാത്തു സംരക്ഷിക്കും നാടേ. 
അറബിക്കടലിന്റെ ഭാവഭേദങ്ങള്‍ 
നോക്കി രസിക്കുന്ന നാടേ. 
ഇരേഴു പതിനാലു ലോകങ്ങളുള്ള
മലയാളത്തിന്‍ സ്വന്തം നാടേ. 
 എന്റെ നാടേ, എന്റെ വീടേ
മമ സോദരങ്ങള്‍ വസിക്കുന്ന വീടേ.
കേരദേശത്തിന്‍ സ്വന്തമായ്
ചൊല്ലിയാടും കഥകളിയാട്ടവും
ലാസ്യസൌന്ദര്യത്തികവേറും
മോഹിനിയാട്ടതിന്‍ ജന്മനാടെ.
എന്റെ നാടേ, എന്റെ വീടേ,
മമ ദൈവത്തിന്ടെ സ്വന്തം നാടേ.
ഹരിതപ്രഭയില്‍ നിറഞ്ഞുനില്‍ക്കും
കാനന ഭുമി നിറഞ്ഞ നാടെ.
കായലും പുഴകളും കാട്ടരുവികളും
പാടിയോഴുകി രസിക്കും നാടേ.
തുഞ്ചന്റെ കുഞ്ചന്റെ ഓര്‍മ്മകള്‍ ചൂഴും 
കവിതകള്‍ പാട്ടും നിറഞ്ഞ നാടേ .
    
                          ഇന്ദുജ സന്തോഷ്‌ (11 എ)